Lögregla rannsaki betur vopnakaup í Sæbrautarmáli

Rannsókn lögreglunnar á vopnakaupum morðingjans í Sæbrautarmálinu svokallaða var ófullnægjandi að mati ríkissaksóknars sem hefur gert lögreglu að rannsaka málið betur.

Karlmaður skaut annan mann á Sæbrautinni síðasta sumar stuttu áður en hann svipti sig lífi á Þingvöllum. Morðinginn keypti vopnið sem hann notaði í verslun í Reykjavík. Rannsókn lögreglu var nánast lokið þegar fréttastofa Stöðvar 2 greindi frá að hann hafði ekki skotvopnaleyfi og framvísaði leyfi vinar síns við kaupin á vopninu.

Móðir mannsins sem var myrtur gagnrýndi lögreglu og skotvopnasala í fréttum Stöðvar 2 í haust og sagði að tryggja þyrfti að slíkt kæmi ekki fyrir aftur.

Rannsókn lögreglu fór þá að beinast að vopnasalanum og lauk henni ekki fyrr en á þessu ári. Þá var málið sent til ríkissaksóknara sem sendi það aftur til lögreglu til frekari rannsókna.

Jón Snorrason aðstoðarlögreglustjóri á höfuðborgarsvæðinu sagði í samtali við fréttastofu í dag að rannsóknin væri vel á veg komin. Búið væri að yfirheyra sölumanninn og aðeins ætti eftir að ganga frá nokkrum lausum endum. Jón gat ekki svarað því hvort málið yrði sent aftur til ríkissaksóknara, ákvörðun um það yrði tekin þegar rannsókn væri lokið. Lögreglan sér um útgáfu kaupleyfa fyrir skotvopn.

Aðspurður hvort rannsóknin beindist að einhverju leyti að útgáfu kaupleyfisins sagði Jón svo ekki vera.