Bent: Léttir að vera laus við Ramos

Darren Bent, sóknarmaður Tottenham, segir að lífið hjá félaginu hafi verið mjög erfitt undir stjórn Juande Ramos. Hann segir að Ramos hafi átt erfitt með samskipti við leikmenn vekna slakrar enskukunnáttu.

Ramos var rekinn á dögunum og hefur Tottenham komist á beinu brautina með Harry Redknapp við stjórnvölinn. „Stemningin á æfingasvæðinu var engin og það var mjög erfitt að vera þar. Það má segja að með tilkomu Harry hafi menn öðlast nýtt líf," sagði Bent.

„Hann hefur blásið sjálfstrausti í menn og nú trúa menn því að við eigum ekki heima í botnbaráttunni. Harry getur rætt við leikmenn og menn vita alltaf hvað hann er að meina. Það er mikill munur frá því hvernig þetta var."

„Mórallinn í liðinu var orðinn mjög slæmur en sem betur fer hefur það breyst. Sigurviljinn er kominn í menn og við höfum aftur gaman að því að spila fótbolta," sagði Bent.