Hughes nýtur stuðnings hjá City

Mark Hughes stjóri Manchester City nýtur enn stuðnings stjórnarformanns félagsins þrátt fyrir enn eitt tapið í deildinni í gær. City hefur aðeins unnið einn af síðustu sjö deildarleikjum sínum.

City tapaði í gær 2-1 fyrir Tottenham á heimavelli þar sem tveir af leikmönnum liðsins voru reknir af velli og einn úr liði gestanna.

Stjórnarformaðurinn Khalodoon Al Mubarak var á meðal áhorfenda í gær en hann vísar því á bug að farið sé að volgna undir knattspyrnustjóranum.

"Við höldum allir ró okkar og höfum fulla trú á Hughes. Við vinnum allir vel saman og liðið er alltaf að læra. Sem betur fer les ég ekki blöðin sem skrifa að starf Hughes sé í hættu og að við séum að íhuga að ráða hina og þessa stjóra til félagsins. Það er þvættingur," sagði stjórnarformaðurinn í samtali við Sky.

"Það opnast áhugavert tækifæri fyrir Hughes í janúar til að styrkja liðið. Við ætlum að byggja hér stórveldi og erum aðeins búnir að vera hér í tvo mánuði."