Barton tileinkaði stuðningsmönnum markið

Joey Barton tileinkaði markið sem hann skoraði í 2-1 sigri Newcastle á West Brom í gær öllum þeim sem hann hefur valdið vonbrigðum á undanförnum mánuðum.

Barton skoraði fyrra mark Newcastle úr vítaspyrnu en hann var í fyrsta sinn í byrjunarliðinu síðan hann sat í fangelsi fyrr á árinu vegna líkamsárásar.

„Þetta var fyrir alla stuðningsmennina og þeim sem ég hef valdið vonbrigðum," sagði Barton. „Ég hef mátt rífa mig upp eftir mín heimskupör og þetta verður vonandi það sem koma skal."

„Þegar dómarinn dæmdi víti langaði mig mikið að taka vítið. En margir aðrir leikmenn voru spenntir fyrir því líka. Ég vona að þetta hafi verið fyrsta markið af mörgum."

„Ég hef aldrei verið hræddur við að taka vítaspyrnur. Það er ekki hægt að saka mig um að skorta hugrekki."