Ince tekur við Blackburn

Paul Ince verður ráðinn knattspyrnustjóri Blackburn eftir því sem heimildir fréttastofu BBC herma.

Mark Hughes hætti hjá Blackburn nú í vor og tók þá við knattspyrnustjórn Manchester City. Ince mun vera efstur á óskalista forráðamanna Blackburn en hann gerði MK Dons að enskum D-deildarmeisturum í vetur.

Sam Allardyce, Steve McClaren og Michael Laudrup hafa allir einnig verið orðaðir við starfið.

Hins vegar heldur John Williams, stjórnarformaður Blackburn, því fram að félagið hafi ekki enn tekið ákvörðun.

„Okkar listi er ekki langur," sagði hann. „Ég er ánægður með hvernig þetta hefur gengið og vonandi munum við taka ákvörðun áður en vikan er liðin. Við höfum borið okkur fagmannlega að og ekki boðið neinum starfið enn sem komið er."