Sautján mánaða bölvun Bale

Velski landsliðsmaðurinn Gareth Bale hefur gert það nokkuð gott hjá Tottenham síðan hann var keyptur frá Southampton á sínum tíma.

Þessi 19 ára gamli bakvörður er talinn mikið efni og hefur meira að segja verið orðaður við bæði Liverpool og Manchester United (sjá: Robbie Keane og Dimitar Berbatov).

Þegar ófarir Tottenham stóðu sem hæst í haust og liðinu var fyrirmunað að vinna leik undir stjórn Juande Ramos, var oft talað um framfarir Bale sem "einu sólarglætuna í liðinu." Skuggi liggur þó yfir þessari meintu sólarglætu.

Fyrirmunað að vinna deildarleik

Það er sú staðreynd að Tottenham hefur ekki unnið einn einasta deildarleik þar sem pilturinn hefur komið við sögu frá því hann kom frá Southampton þann 25. maí árið 2007.

Þetta eru alls 18 deildarleikir. Bale hefur átt prýðisgóða leiki með liði sínu í deildinni og hefur náð að skora tvö mörk, en honum virðist fyrir munað að ná í sinn fyrsta sigur í deildinni. Þá er sama hvort hann er í byrjunarliði eða kemur við sögu sem varamaður í nokkrar sekúndur.

Hann hefur misst úr nokkuð marga leiki vegna meiðsla og á einhvern hátt virðast það hafa verið þessir fáu leikir sem Tottenham hefur unnið í deildinni.

Vann síðast Southend

Þegar bikarkeppnir eru annars vegar er svo allt önnur staða uppi á teningnum.

Bale hefur aldrei tapað bikarleik með liðinu, þar sem það hefur unnið sex leiki og gert tvö jafntefli í Evrópukeppni og unnið báða leikina sem hann spilaði í deildabikarnum.

En hvenær vann aumingja Bale þá síðast deildarleik?

Það var þann 6. maí á síðasta ári þegar hann lék með Southampton í 4-1 sigri á Southend - fyrir sautján mánuðum síðan.

Þess má geta að Tottenham vann síðast deildarleik í gærkvöldi þegar það lagði granna sína í West Ham 2-0.

Gareth Bale var þá á varamannabekk Tottenham allan tímann og kom ekki við sögu. Kannski sem betur fer fyrir hans menn.