Gates vill meira frá NATO ríkjum í Afganistan

Robert Gates, varnarmálaráðherra Bandaríkjanna, segir nauðsynlegt að sannfæra Evrópubúa um að verkefni Atlantshafsbandalagsins í Afganistan sé mikilvægur liður í baráttunni gegn hryðjuverkum.

Gates segir NATO í hættu ef sum bandalagsríki leggi ekki meira af mörkum þar. Ummælin lét hann falla á lokadegi öryggisráðstefnu í Munchen í Þýskalandi í morgun.

Bandaríkjamenn hafa síðustu daga þrýst mjög á bandalagsríki að fjölga í herliði sínu í Afganistan. Þeir, auk Breta, Hollendinga og Kandamanna, telja sig bera hitann og þungan af átökum í landinu á meðan Frakkar, Grikkir, Ítalir, Spánverjar og Þjóðverjar takmarki ferðafrelsi sinna hermanna og þátttöku þeirra í hernaðaraðgerðum.