PFS greiðir almannatengslaráðgjöf Hrafnkels

Hrafnkell Gíslason forstjóri Póst- og fjarkskiptastofnunar leitaði til almannatengils til að fá ráðgjöf með hvernig hann ætti að höndla umræðu um eineltismál á stofnuninni. Samkvæmt heimildum Vísis leitaði hann til Gunnars Steins Pálssonar almannatengils til að fá ráðgjöf um hvernig hann ætti að snúa sér varðandi það fjaðrafok sem málið hefur vakið í fjölmiðlum.

Í viðtali við Vísi sagði Hrafnkell að hann hefði leitað til Gunnars. Á hverju ári færu um 20-30 milljónir í alls kyns ráðgjöf sem tengdist stofnuninni. Þar væri bæði um að ræða ráðgjöf varðandi bókhald, lögfræði, vefsíðugerð og almannatengsl. „Þetta kaupum við í tugmilljónavís. Það er mikil hefð og reynsla fyrir því," sagði Hrafnkell.

Aðspurður að því hver greiddi reikninginn af þjónustu Gunnars Steins sagði hann enga ástæðu til að ætla annað en að stofnunin stæði straum af kostnaði.

„Ég vísa því alfarið á bug að þetta snúist um mig persónulega. Umræðan snýst um stofnunina þar sem ég er persónugerður," sagði hann.

Gunnar Steinn sagðist af prinsippástæðum hvorki tjá sig um viðskiptavini sína né verkefni, en hann kannaðist við málið og sagðist oft vinna í svokölluðum krísumálum.