Viðamikil snjóflóðaæfing björgunarsveita

Viðamikil björgunaræfing fer fram ofan Sandskeiðs í dag og verða meðal annars tvær þyrlur á æfingunni, sem hefst upp úr klukkan tíu og stendur fram til klukkan tvö. Björgunarsveitir Slysavarnafélagsins Landsbjargar, Landhelgisgæslan og greiningasveit Landspítala háskólasjúkrahúss æfa viðbrögð við snjóflóði og verður notast við búnað sem sérhannaður er til snjóflóðaleitar úr þyrlum en Landsbjörg færði Landhelgisgæslunni slíkan búnað að gjöf fyrir skömmu.

Vonast er til að hann efli enn frekar leit og björgun úr snjóflóðum. Þyrlusveitirnar munu æfa sig í að nota snjóflóðaleitarbúnaðinn til að staðsetja fólk sem lent hefur í snjóflóði og björgunarsveit kemur því til aðstoðar. Settar verða upp greiningarbúðir með sjúkratjaldi á svæðinu en þangað verða þeir fluttir sem leika hina slösuðu á æfingunni.