Attwell kallaður á fund Hackett

Enski knattspyrnudómarinn Stuart Attwell mun á morgun hitta Keith Hackett, yfirmann dómaramála á Englandi, og ræða um frammistöðu sína í viðureign Derby og Nottingham Forest um nýliðna helgi.

Attwell er aðeins 25 ára og varð fyrr á tímabilinu sá yngsti til að fá réttindi til að dæma í úrvalsdeildinni. Hann komst í fréttirnar þegar hann dæmdi draugamarkið fræga í 2-2 jafnteflisleik Watford og Reading.

Hann tók margar mjög umdeildar ákvarðanir í leiknum á Pride Park á laugardaginn en hann endaði með jafntefli 1-1. Paul Jewell, knattspyrnustjóri Derby, gagnrýndi Atwell harðlega eftir leikinn.

Attwell dæmdi af mark Derby seint í leiknum en benti í staðinn á vítapunktinn. Markvörður Forest varði hinsvegar vítaspyrnuna. Stuttu seinna skoraði Derby aftur en Attwell dæmdi markið hinsvegar af þó enginn nema hann viti af hverju.

„Ég var ekki viðstaddur þennan leik og hef ekki haft tækifæri til að skoða upptökur frá honum. En það var eftirlitsmaður á honum og við erum að bíða eftir skýrslu frá honum," sagði Hackett.

„Skýrslan verður til staðar þegar við fundum um þennan leik á morgun. Við verðum þrír á þessum fundi, auk míns og Stuart verður annar úrvalsdeildardómari með okkur. Þetta er bara hefðbundinn fundur hjá okkur," sagði Hackett sem vonar að gagnrýnin á Attwell muni ekki skaða sjálfstraust hans eða orðspor.

„Stuart er góður dómari og það breytist ekkert í einum leik. Vonandi hefur þetta ekki áhrif á hann. Við erum með íþróttasálfræðinga á okkar bandi sem aðstoða dómara."