Ef mér líst vel á þjálfarann fer ég

Aron Einar Gunnarsson heldur í dag til Englands og mun á morgun gangast undir læknisskoðun og hitta Chris Coleman, knattspyrnustjóra Coventry.

Ferðinni var frestað um einn dag þar sem Coleman var staddur í Sviss til að fylgjast með EM í knattspyrnu.

AZ Alkmaar, félag Arons Einars í Hollandi, hefur þegar samið við Coventry um kaupverð og nú þarf Aron sjálfur að semja um kaup og kjör.

„Ég er nú búinn að sjá einhverjar tölur og líst bara vel á þær. Ég þarf svo að hitta stjórann og heyra hvað hann hefur að segja. Ef mér líst vel á hann þá fer ég," sagði Aron í samtali við Vísi í dag.

Coventry leikur í ensku B-deildinni og náði naumlega að bjarga sér frá falli á síðustu leiktíð. Liðið varð í 21. sæti, einu stigi fyrir ofan Leicester sem féll í C-deildina.

Bjarni Guðjónsson lék með Coventry fyrir fáeinum misserum.