Síðasti landsleikur Englendinga strokaður út?

Fjórir leikmenn enska landsliðsins gætu misst sinn fyrsta landsleik en FIFA íhugar að skrá ekki 3-0 sigurinn á Trínidad og Tóbagó sem opinberan landsleik. Ástæðan er sú að enska liðið framkvæmdi sjö skiptingar en aðeins sex eru leyfðar í vináttulandsleikjum.

Dean Ashton, Joe Hart, Phil Jagielka og Stephen Warnock spiluðu allir sinn fyrsta landsleik gegn Trínidad og Tóbagó. Þessi sigur Englands gæti þó verið strokaður út úr sögubókunum.

Enska knattspyrnusambandið ætlar ekki að taka þessu þegjandi og hljóðalaust og segist hafa fengið fullt leyfi fyrir skiptingunum frá starfsmönnum FIFA á leiknum.

Ef leikurinn verður ekki skráður eru það einnig mikil vonbrigði fyrir Gareth Barry sem skoraði sitt fyrsta landsliðsmark í leiknum. Þá myndi David Beckham missa út einn leik sem skráður fyrirliði.