Andreas Isaksson til PSV

Sænski landsliðsmarkvörðurinn Andreas Isaksson hefur gengið til liðs við PSV Eindhoven í Hollandi.

Kaupverðið er óuppgefið en Isaksson skrifaði undir fjögurra ára samning hjá PSV. Hann mun væntanlega koma í stað Heurelho Gomes sem er sagður á leið til Tottenham.

Hann gekkst undir læknisskoðun í dag og stóðst hana. „Ég hlakka til að spila með PSV og líður mér vel hér," sagði hann.

Isaksson átti fremur erfitt uppdráttar hjá Manchester City og spilaði aðeins 20 leiki með aðalliðinu eftir að hann gekk til liðs við City frá Rennes í Frakklandi sumarið 2006. Hann missti sæti sitt í liðinu til Joe Hart nú í haust.