Meistararnir byrja á jafntefli

Englandsmeistarar Manchester United gerðu 1-1 jafntefli gegn Newcastle í ensku úrvalsdeildinni í dag. Obafemi Martins kom Newcastle yfir í fyrri hálfleik með skallamarki en Darren Fletcher jafnaði skömmu síðar.

Bitleysi var í sóknarleik Manchester United í leiknum og ekki ólíklegt að enn meiri kraftur verði nú settur í að krækja í Dimitar Berbatov.

Fyrr í dag fetaði Manchester City í fótspor FH og fékk á sig fjögur mörk gegn Aston Villa. Villa vann leikinn 4-2 þar sem Gabriel Agbonlahor skoraði þrennu á sjö mínútum.

John Carew kom Villa yfir en Elano jafnaði úr vítaspyrnu. Villa komst síðan í 4-1 áður en Vedran Corluka minnkaði muninn undir lokin.