Tvö hundruð þúsund króna sekt fyrir að ráðast á tvær konur

Héraðsdómur Reykjavíkur hefur dæmt karlmann til að greiða 200 þúsund króna sekt fyrir líkamsárás gegn tveimur konum í september í fyrra.

Samkvæmt gögnum málsins voru atvik þau að maðurinn kom heim til sín um nótt þar sem sambýliskona hans og vinkonur hennar voru með gleðskap. Ákærði vildi að vinkonurnar færu og fór inn á baðhergi. Þegar ein konan vildi fara á salernið meinaði hann henni það og kom til handalögmála.

Samkvæmt ákæru sneri hann upp á handlegg annarrar konunnar og tók hana hálstaki tvisvar þannig að hún fékk mar á hálsi, báðum handleggjum og baki. Hinni hrinti hann út úr íbúðinni svo að hún lenti á handriði í stigagangi með þeim afleiðingum að hún hlaut nokkra marbletti á vinstri handlegg og öxl.

Maðurinn játaði sök og var tekið tillit til þess ásamt því að áverkar kvennanna voru ekki alvarlegir.