Fimm mánaða fangelsi fyrir að stela Magga mörgæs og Mikka mús

Karlmaður var í héraðsdómi Reykjaness dæmdur í fimm mánaða fangelsi fyrir innbrot í hús í Höfnum í Reykjanesbæ. Stal hann meðal annars fartölvu, myndavélum og tveimur sparibaukum, þeim Magga mörgæs og Mikka mús. Maðurinn var á skilorði en hann hefur hlotið fjölmarga refsidóma frá árinu 1979.

Maðurinn neitaði sök en viðurkenndi að hafa farið inn í húsið með félaga sínum umrætt kvöld. Hann hélt hinsvegar að félaginn byggi í húsinu og þeir væru að ná í eigur hans til þess að koma í verð. Rétt áður en þeir fóru í leiðangurinn tóku þeir inn Rivolintöflur og af þeim sökum hefði hann verið utan við sig og munað lítið eftir atvikinu.

Á eldhúsborði hússins var Vodka Smirnoff peli, sem var í eigu heimilisfólks og hafði verið uppi í hillu. Drukkið hafði verið úr pelanum og hann skilinn eftir á borðinu. Að sögn húsráðenda var eftirtalinna muna saknað:

1 Dell D-620 fartölva ásamt spennugjafa,

1 HP NX-9000 fartölvu ásamt spennugjafa,

2 Canon myndavélum,

1 harður tölvudiskur, flakkari, ásamt spennugjafa,

2 sparibaukar, annar Maggi mörgæs og hinn Mikka mús dós,

1 GSM farsími af gerðinni Nokia 3100.

Maðurinn var eins og fyrr segir dæmdur í fimm mánaða fangelsi en hann hefur hlotið fjölmarga dóma frá árinu 1979 og var á skilorði.