Sannfærðir um að Ronaldo verði áfram á Old Trafford

Samkvæmt fréttum í breskum miðlum í morgun virðast Manchester United vera nokkuð vissir um að Cristiano Ronaldo muni ekki ganga til liðs við Real Madrid nú í sumar. The Daily Mail heldur því fram að bæði Sir Alex og David Gill framkvæmdarstjóri séu nokkuð vissir um að portúgalinn verði á Old Trafford, þrátt fyrir áhuga Madrid og fréttir þess efnis að tilboð sé á borðinu.

Daily Marca í Madrid sem hefur verið að kynda undir söluna undanfarnar vikur hélt því fram á föstudag að samningurinn væri aðeins „klukkutímum eða dögum" frá því að vera tilbúinn. Evrópumeistararnir svörðu hinsvegar að bragði og sögðu leikmanninn ekki vera til sölu.

„Þetta er algjörlega út í hött og í raun hlægilegt. Cristiano Ronaldo er ekki til sölu," sagði talsmaður enskra í kjölfar fréttanna í gær.

The Mail vitnar í heimildarmann í morgun sem segir að Real Madird geti boðið eins hátt og þeir vilja, af sölunni verði ekki. „Allt þetta mál hefur farið mjög í taugarnar á öllum hjá klúbbnum og nú virðist þetta vera orðin spurning um „prinsipp". Hvaða skilaboð værum við að senda til hinna strákanna í liðinu ef Ronaldo yrði leyft að fara. Það myndi skapa ringulreið í okkar herbúðum," sagði heimildarmaðurinn einnig.

Blaðið heldur því einnig fram að United telji Real Madrid aðeins hafa róað sig í öllum æsingnum og muni ekki leggja fram tilboð nema Ronaldo biðji sjálfur um að fá að fara.

Því er einnig haldið fram að nokkur lið í Evrópu, þar með Barcelona, hafi haft samband við United og hvatt þá til þess að gefa ekkert eftir, og standa á sínu gegn Madrídingum.

Þrátt fyrir allar þessar vangaveltur lítur út fyrir að Ronaldo missi af upphafi næsta tímabils, vegna meiðsla á ökkla og aðgerðar sem hann þarf að gangast undir vegna þess.