McCarthy stjóri mánaðarins í B-deildinni

Mick McCarthy var í dag valinn stjóri ágústmánaðar í ensku Championship deildinni eftir að hafa komið liði Wolves á toppinn. Liðið gerði jafntefli í fyrsta leik sínum í deildinni en hefur síðan unnið þrjá leiki í röð.

McCarthy er ánægður með þróun mála í upphafi leiktíðar og segir batamerki á liði sínu frá síðustu leiktíð.

"Það er gott að fara í landsleikjahlé á toppnum en við missum okkur ekki þó vel gangi í nokkrum leikjum. Annars er liðið að bæta sig mikið. Í fyrra áttum við það til að vera miklu betri en andstæðingar okkar, en náðum ekki að nýta okkur það. Nú erum við farnir að skora mörk og því gengur betur," sagði McCarthy.