WBA kaupir sænskan varnarmann

Enska úrvalsdeildarfélagið West Brom hefur fest kaup á sænska varnarmanninum Jonas Olsson frá hollenska liðinu NEC Nijmegen fyrir 800 þúsund pund.

Olsson þessi er 25 ára gamall vinstri bakvörður og á að baki leiki fyrir yngri landslið Svía. Hann hefur skrifað undir tveggja ára samning við WBA, en kaupverðið gæti hækkað upp yfir milljón punda ef leikmaðurinn nær að festa sig í sessi á Hawthorns.

Olsson er tíundi leikmaðurinn sem keyptur er til WBA í sumar og ekki veitir af, því nýliðarnir sitja á botni úrvalsdeildarinnar með aðeins eitt stig eftir þrjár umferðar.

Þá ku liðið einnig hafa verið búið að ganga frá lánssamningi við hollenska varnarmanninn Ryan Donk hjá AZ Alkmaar í Hollandi.