Robson, Keane og... Anderson?

Sir Alex Ferguson virðist hafa miklar mætur á brasilíska miðjumanninum Anderson ef marka má ummæli hans í Manchester Evening News.

Hinn tvítugi Anderson hefur verið að bæta sig mikið í liði Manchester United og svo virðist sem Ferguson treysti honum til að taka við af Paul Scholes sem kóngurinn á miðjunni hjá meisturunum.

"Anderson er öðruvísi leikmaður en Roy Keane, en það er eðlilegt að menn velti fyrir sér framtíðinni nú þegar Keane er farinn í þjálfun og Paul Scholes er að komast á síðustu metrana. Þá horfir maður til Anderson og sér mann sem á bjarta framtíð fyrir sér," sagði Ferguson.

"Við höfum breytt nokkuð um stíl á síðustu árum og erum með öðruvísi leikmenn en við höfðum áður. Þegar ég kom hingað var Bryan Robson kóngurinn á miðjunni og enginn átti að geta komið í hans stað. Þá kom Roy Keane inn í liðið og tók við leiðtogahlutverkinu sem hann leysti á einstakan hátt. Svo héldu menn að skór Keane yrðu aldrei fylltir hjá félaginu en þá kemur leikmaður eins og Anderson upp og nýir tímar fylgja í kjölfarið," sagði knattspyrnustjórinn.