Fyrsti sigur Tottenham - Robinho með þrennu

Tottenham vann sinn fyrsta sigur í ensku úrvalsdeildinni á tímabilinu er liðið lagði Bolton, 2-0. Þetta var einnig fyrsti leikur liðsins eftir að Juande Ramos var rekinn sem knattspyrnustjóri Tottenham og Harry Redknapp ráðinn í hans stað.

Þá vann Manchester City öruggan 3-0 sigur á Stoke auk þess sem Aston Villa vann sigur á Wigan á útivelli með fjórum mörkum gegn engu.

Roman Pavlyuchenko sá til þess að Redknapp fékk óskabyrjun með Tottenham en hann skoraði fyrsta mark leiksins með skalla eftir fyrirgjöf David Bentley. Þetta var einnig fyrsta mark Pavlyuchenko í deildinni.

Gavin McCann, leikmaður Bolton, fékk svo að líta sitt annað gula spjald snemma í síðari hálfleik fyrir að tæklingu á Tom Huddlestone.

Darren Bent kom inn á sem varamaður skömmu síðar og fiskaði vítaspyrnu undir lok leiksins er Jussi Jaaskaleinen er dæmdur brotlegur í viðskiptum þeirra. Bent skoraði af öryggi úr spyrnunni.

Grétar Rafn Steinsson lék allan leikinn fyrir Bolton en Heiðar Helguson sat allan tímann á varamannabekknum.

Robinho skoraði öll þjrú mörk Manchester City gegn Stoke, þar af tvö í síðari hálfleik.

Hjá Aston Villa kom Gareth Barry sínu liði yfir með marki úr vítaspyrnu á 22. mínútu en þeir Gabriel Agbonlahor, John Carew og Steve Sidwell skoruðu hin mörk Villa í síðari hálfleik.

Tottenham er þó enn á botni deildarinnar en nú með fimm stig.

Aston Villa er hins vegar komið upp í fjórða sæti deildarinnar með sautján stig eftir sigurinn í dag á meðan að City er í sjöunda sæti með þrettán stig.