Hargreaves missir af landsleikjunum

Owen Hargreaves verður ekki með enska landsliðinu í þeim tveimur leikjum sem eru framundan hjá liðinu í undankeppni HM 2010.

Hargreaves á við hnémeiðsli að stríða en mun engu að síður spila með United gegn Zenit St. Pétursborg í kvöld í hinum árlega Super Cup-leik.

Hins vegar sagði Alex Ferguson, stjóri United, að Hargreaves myndi missa af landsleikjunum.

„Hann þarf tíma til að jafna sig og verður því ekki tilbúinn."

Fabio Capello landliðsþjálfari sagði það ljóst að Hargreaves væri ekki tilbúinn. „Hver sem er gæti spilað gegn Andorra en menn þurfa að vera 100 prósent klárir gegn Króatíu. Owen þarf nú að fá rétta meðferð við meiðslum sínum. Hann hefur æft í nokkra daga og hefur gott af því að fá að spila nokkrar mínútur í leik. En hann mun ekki ná landsleikjunum."