Aukinn launakostnaður þungur baggi á West Ham

Þó svo að tekjur West Ham hafi minnkað um nærri tvær milljónir punda á milli ára jókst launakostnaður félagsins um tæpar þrettán milljónir.

West Ham kom verst út úr þessum samanburði af öllum félögunum sem léku í ensku úrvalsdeildinni árin 2006-7, að því sem kemur fram í árskýrslu Deloitte um fjármál knattspyrnuheimsins. WH Holding keypti félagið þá um haustið en aðaleigandi félagsins var Björgólfur Guðmundsson.

Eggert Magnússon tók þá við stjórnarformennsku í félaginu en lét af því starfi í desember síðastliðinn. Þá seldi hann einnig Björgólfi sinn hlut í félaginu.

Launakostnaður West Ham jókst um 41 prósent eftir að Íslendingarnir keyptu félagið. Aðeins hjá Portsmouth (49%), Sheffield United (48%), Watford (76%) og Reading (109%) var um hærri hlutfallsaukningu að ræða. Þrjú síðastnefndu liðin voru nýliðar í deildinni það tímabilið og Portsmouth skipti um eigendur á viðkomandi tímabili, rétt eins og West Ham.

Nýliðarnir þrír áttu þó allir fyrir auknum launakostnaði þar sem tekjuaukning félaganna var mun meiri en aukinn launakostnaður. Portsmouth og West Ham juku bæði launakostnað um 12-13 milljónir punda. Munurinn á félögunum er hins vegar sá að tekjur Portsmouth þetta tímabilið jukust um tæpar fjórar milljónir punda á meðan að tekjur West Ham minnkuðu um tæpar tvær milljónir punda.

Heildarlaunakostnaður West Ham fyrir áðurnefnt keppnistímabil voru rúmir 44 milljónir punda sem er rétt undir meðaltali deildarinnar. Aðeins fimm félög eru með hærri launakostnað en það eru Chelsea (132 milljónir punda), Manchester United (92), Arsenal (89), Liverpool (77) og Newcastle (62).

WH Holding keypti West Ham United fyrir 108 milljónir punda í nóvember árið 2006.