Aston Villa hafnaði Liverpool aftur

Aston Villa hefur hafnað öðru tilboði Liverpool í Gareth Barry. „Tilboðið sem við fengum var aðeins skárra en afstaða okkar hefur ekkert breyst," sagði talsmaður Aston Villa.

Liverpool hefur verið á höttunum eftir Barry undanfarnar vikur en hann á tvö ár eftir af samningi sínum við Aston Villa. Sjálfur hefur hann ekkert sagt opinberlega um sínar óskir en enskir fjölmiðlar hafa haldið því fram að hann vilji fara til Liverpool svo hann gæti spilað í Meistaradeild Evrópu.

Martin O'Neill, stjóri Aston Villa, hefur gagnrýnt Liverpool mjög fyrir starfsaðferðir sínar í þessu máli.

Talið er að tilboðið hafi hljómað upp á þrettán milljónir punda en Aston Villa er sagt vilja fá átján milljónir punda fyrir Barry.