Geir: Dagur má hafa sínar skoðanir

Geir Þorsteinsson, formaður KSÍ, hafði ekki séð viðbrögð Dags B. Eggertssonar við bréfinu sem Geir sendi borgarstjóra Reykjavíkur vegna framúrkeyrslu við byggingu nýrrar stúku við Laugardalsvöll og vildi því ekki tjá sig um svörin þegar Vísir ræddi við hann í dag.

Geir segir að Dagur megi hafa sínar skoðanir á bréfinu en að KSÍ standi við efni bréfsins.

Vísir greindi fyrst frá bréfinu í morgun. Í því biður Geir Þorsteinsson Reykjavíkurborg afsökunar á því að ekki hafi verið haldnir fleiri fundir í byggingarnefndinni sem áti að hafa eftirlit með framkvæmdum.

Hins vegar segist Geir í bréfinu ekki getað setið undir þeim fullyrðingum sem Dagur B. Eggertsson hafði upp í fjölmiðlum um að honum hefði ekki verið kunnugt um framúrkeyrsluna í Laugardal.

Í bréfinu segir Geir að Dagur hafi setið báða fundi byggingarnefndarinnar þegar afdrífaríkustu ákvarðanirnar í málinu voru teknar án þess að gera athugasemdir.

"Honum átti að vera fullkunnugt um þessa framúrkeyrslu," segir Geir í bréfinu.

Þessu neitar Dagur. „Í þessum texta eru fulllyrðingar sem stangast á við fyrirliggjandi gögn og fundargerðir auk yfirlýsinga Geirs sjálfs frá því fyrir páska. Ég átta mig þess vegna ekki á því hvernig þetta varð til," segir Dagur. Hann segir að í bréfi Geirs sé missagt hvað fór fram á fundum byggingarnefnda. Þá segir Dagur það liggja fyrir að KSÍ hafi tekið einhliða ákvörðun um að semja við Ístak um framkvæmdir án nokkurs samráðs. Einnig hafi KSÍ gert beytingar á útboðsgögnum án aðkomu byggingarnefndar eða borgarinnar.

Þá leggur Dagur áherslu á að stærstur hluti framúrkeyrslunnar sé vegna viðbótar- og aukaverka sem KSÍ samþykkti löngu eftir kosningar. Hann hafi þá verið hættur í byggingarnefndinni. „Það þarfnast því alveg sérstakra skýringa hvers vegna formaður KSÍ kýs að gera minn hluta í þessu tortryggilegan. Vegna þess að í minni tíð var þó eitthvað eftirlit af hálfu bygginganefndar. Eftir stendur þó að engin viðbótar- og aukaverk sem KSÍ samþykkti voru borin undir byggingarnefnd," segir Dagur B. Eggertsson.