Di Canio vill taka við West Ham

Ítalinn Paolo Di Canio hefur sett sig í samband við forráðamenn West Ham og boðist til að taka við starfi knattspyrnustjóra félagsins. Þetta staðfesti umboðsmaður hans í samtali við breska ríkissjónvarpið í dag.

Di Canio er fertugur og var goðsögn á Upton Park þegar hann spilaði þar á árum áður og var einn litríkasti leikmaður úrvalsdeildarinnar.

"Við höfum sett okkur í samband við West Ham og beðið um að Di Canio verði tekinn til greina þegar kemur að ráðningu knattspyrnustjóra. Hann væri ekki að gefa kost á sér nema hann teldi að hann væri maður í starfið," sagði umboðsmaðurinn.

"Við viljum bara tækifæri til að setjast niður með stjórninni og segja þeim hvað hann hefur fram að færa og hvernig hann hefði hug á að koma liðinu lengra. Hann getur auðvitað ekki gert það nema hann fái að ræða við stjórnina."