Þrír látnir eftir jarðskjálfta á Indónesíu

Að minnsta kosti þrír létust og 25 slösuðust alvarlega í sterkum jarðskjálfta sem reið yfir Aceh hérað í Indónesíu í morgun. Fjölmargar byggingar skemmdust í skjálftanum sem var 7,5 á Richter og átti upptök sín nálægt eynni Simeulue, 319 km frá strönd Súmkötru.

Skjálftamiðjan var á svipuðum slóðum og stóri skjálftinn árið 2004 sem kom flóðbylgju af stað sem varð um 200 þúsund manns að bana. Flóðbylgjuviðvörun var sett í gang, en síðan dregin til baka.

Íbúar eyjarinnar voru skelfingu lostnir þegar skjálftinn reið yfir og þustu út úr byggingum þegar þær byrjuðu að hristast. Fjöldi manns fór til fjalla.

Í fyrstu var skjálftinn talinn 6,6 á Richter, en samkvæmt heimildum BBC sýndu mælingar að hann var 7,5.

Skjálftinn sem orsakaði flóðbylgju á annan í jólum árið 2004 mældist 9,0 á Richter. Þremur mánuðum síðar varð annar skjálfti upp á 8,7 sem kostaði eitt þúsund mannslíf á eyjunum Simeulue og Nias.