Hleb ósáttur við Wenger

Alexander Hleb er líklega á leið frá Arsenal og til Barcelona. Hann segir að slæm samskipti sín og knattspyrnustjórans Arsene Wenger sé ein helsta ástæða þess að hann vilji yfirgefa enska liðið.

„Mín sýn á fótbolta og Wengers fara einfaldlega ekki saman. Ég ræddi við hann á síðustu leiktíð um að ég vildi fara en það fór illa í hann. En þið verðið að spyrja hann, það gæti verið að hann fagni því þegar ég er horfinn á braut," sagði Hleb.

Þá fær miðjumaðurinn Cesc Fabregas einnig að heyra það frá Hleb. „Þegar við fáum marktækifæri þá er hann miklu eigingjarnari en ég. Hann notar hvert einasta tækifæri til að skjóta," sagði Hleb.