„Austurríki ekkert miðað við Bláfjöll um helgina“

Frábær mæting var á skíðasvæðið í Bláfjöllum í gær. Þá mættu milli sjö og níu þúsund manns; „Í algjörri bongóblíðu og færi eins og það gerist best," segir Einar Bjarnason verkstjóri. Þrátt fyrir fjöldann mynduðust ekki miklar biðraðir, mestur var biðtíminn um fimm mínútur í nýju stólalyftunni í Kóngsgili.

Einar segir veðrið og færið nú jafnvel betra en í skíðasvæðum Alpanna. „Það hefur verið logn og frost á nóttunni og daginn í marga daga og þá verður færið eins og silki."

Öll helstu skíðasvæði landsins eru opin í dag. Í Bláfjöllum og Skálafelli er hæglætis veður og um þriggja stiga frost. Í Hlíðarfjalli á Akureyri er um sex stiga frost og gott skíðafæri.

Á skíðasvæði Tindastóls í Skagafirði eru aðstæður til skíðaiðkunar með besta móti. Þar er nú um sex stiga frost og verða allar lyftur opnar til klukkan fimm í dag.

Einar býst við góðu veðri um páskana eftir að hafa fengið nýjustu veðurspá í gær. „Þannig að við sjáum fram á nokkuð góða páska, loksins."