Grunur um íkveikju í fjölbýlishúsi í Breiðholtinu

Grunur leikur að kveikt hafi verið í íbúð í fjölbýlishúsi í Breiðholti í morgun þar sem hátt í tvö hundruð manns búa. Engum varð meint af en íbúar í húsinu hafa farið fram á að íbúðin verði seld þar sem óregla sé á leigjendum þar.

Allt tiltækt lið Slökkviliðsins á höfuðborgarsvæðinu var kallað út rétt eftir klukkan tíu í morgun vegna elds í fjölbýlishúsi í Hrafnhólum í Breiðholti. Eldurinn kviknaði í íbúð á annarri hæð en húsið er átta hæða. Um í fimmtíu íbúðir eru í húsinu og hátt í tvö hundruð íbúar. Margir voru heima þegar eldsins varð vart en nokkur reyk lagði frá íbúðinni og inn í stigahúsið. Neyðarlínan sendi strax talskilaboð í síma allra sem skráðir eru til heimilis í húsinu og íbúarnir voru beðnir um að halda kyrru fyrir í íbúðum sínum þar til slökkviliðið tilkynnti um annað. Helga Kristín Sigurðardóttir, formaður Húsfélagsins Hrafnhólum 6-8, segir íbúum hafa brugðið mjög þegar þeir fengu skilaboðin.

Greiðlega gekk að slökkva eldinn og varð engum íbúa meint af. Íbúðin þar sem eldurinn kviknaði var mannlaus og rannsakar lögreglan eldsupptök. Grunur er um að kveikt hafi verið í íbúðinni þar sem eldur kviknaði á tveimur stöðum þar inni. Íbúðin er í útleigu á vegum Félagsbústaða en húsfélagið hefur farið fram á það um nokkurt skeið leigjendunum verði vísað úr íbúðinni og hún seld. Helga Kristín segir mikla óreglu hafa verið á íbúunum og oft hafi þurft að kalla til lögreglu vegna þeirra.