Engin vörubretti þrátt fyrir fjárstyrk

Enn hafa engin vörubretti verið framleidd í Mývatnssveit. Hratt gengur á opinbert fé sem fékkst til framleiðslunnar og lýsa heimamenn vonbrigðum.

Tvö hundruð milljónir króna fengust frá ríkinu í gegnum Nýsköpunarsjóð þegar veðjað var á að framleiðsla vistvænna vörubretta gæti komið að einhverju leyti í stað starfa sem hurfu þegar Kísiliðjan hætti störfum fyrir fjórum árum.

Valgerður Sverrisdóttir fyrrverandi iðnaðarráðherra úthlutaði peningum og stóðu vonir til að framleiðsla á umhverfisvænum vörubrettum myndi veita tugum starfsfólks atvinnu. Viðskiptaáætlun gerði ráð fyrir að mikið magn af pappír, dagblöðum og fleiru yrði flutt frá höfuðborgarsvæðinu norður í land og gufuafl notað til að framleiða vörubretti úr pappírnum. En enn bólar ekkert á brettunum og aðeins 3 starfsmenn eru að störfum við vöruþróun og annað sem til felllur.

Starfsmaður vörubrettaverksmiðjunnar sem rekin er undir merkjum Grænna lausna sagði í samtali við fréttastofu í dag að ekkert væri að frétta en leynd hefur ríkt yfir tilraunaframleiðslu fyrirtækisins. Böðvar Pétursson varaoddviti Mývetninga segir að miðað við áætlanir hafi umfang atvinnustarfseminnar á kísiliðjulóðinni aðeins verið í mýflugumynd til þessa. Mývetningar séu vonsviknir og væntingar hafi ekki gengið eftir. Menn lifi þó í voninni.

Heimildir fréttastofu herma að til skoðunar sé nú að framleiddar verði vélar í verksmiðjunni sem búi til bretti og vélarnar verði seldar út.