Dos Santos hafnaði Manchester United og Chelsea

Giovani Dos Santos segist hafa hafnað bæði Manchester United og Chelsea og þess í stað ákveðið að ganga til liðs við Tottenham.

Hann samdi í sumar við Tottenham sem gæti þurft að greiða Barcelona allt að 8,6 milljónir punda ef hann uppfyllir skilyrði um leikjafjölda.

Dos Santos er nítján ára gamall og þykir með efnilegustu leikmönnum Evrópu. Hann sagði að hann hefði engan áhuga haft á að sitja á bekknum hjá United eða Chelsea.

„Ég vildi fá að spila meira og Tottenham gaf mér það tækifæri," sagði Dos Santos í samtali við El Mundo Deportivo. „Ég fékk góð tilboð frá Chelsea, Manchester United og Ajax en ég hreifst mjög af hugmyndum Juande Ramos. Ég ætla að gera frábæra hluti með Tottenham."

„Ég vil vera stjarna úrvalsdeildarinnar á næsta tímabili. Það er mitt takmark og ástæða þess að ég fór frá Barcelona til Tottenham."

„Ég tel að minn leikstíll henti enska boltanum betur en þeim spænska. En mín fyrsta áskorun verður að aðlagast ensku úrvalsdeildinni."