Stal fjölda bíla með stolnum skilríkjum

Bíræfni bílþjófurinn stal veski frá Stefáni Má Haraldssyni þann 30 október síðastliðinn. Frá þeim tíma, eða á nærri þriggja vikna tímabili nýtti hann sér skilríki Stefáns til þess að sigla undir fölsku flaggi. Hann stal hverri bifreiðinni á eftir annarri og tók út vörur og þjónustu fyrir um 90 þúsund krónur á stolið kreditkort. Þar á meðal tók hann út sígarettur fyrir tugi þúsunda, greiddi hótelreikning og greiddi reikning hjá dýralækni.

Vísir sagði fyrst frá þjófnaði mannsins í gær, eftir að maðurinn stal bíl úr Bílahúsinu í Reykjanesbæ. En hann hafði stolið fleiri bílum undir því yfirskini að hann væri Stefán. Þar á meðal hafði hann tekið bíl laugardaginn 8. nóvember frá Bílahöllinni

Hafði stolið bíl úr Bílahöllinni

Jón Ragnarsson, eigandi Bílahallarinnar, segir að maðurinn hafi komið inn til þeirra og fengið bíl til að prufukeyra. Hann hafi framvísað ökuskirteini, en sölumanninum hafi láðst að bera saman myndina af manninum við manninn sjálfan. „Þegar að hann skilar sér ekki hringjum við og spyrjum hvort að hann ætli ekki að skila bílnum. Stefán skýrir málið og segir að veskinu sínu hafi verið stolið og að maðurinn fari út um allan bæ undir fölsku flaggi," segir Jón. Jón segir að Stefán hafi síðan bent á að Bílahöllinn væri ekki fyrsta bílasalan sem hefði hringt í sig vegna þessa.

Jón segir að eftir helgina hafi síðan verið auglýst eftir bílnum og myndum af bílnum meðal annars verið dreift á nokkrum bensínstöðvum. Um miðja vikuna hafi þessi maður síðan tekið bensín á bílinn á bensínstöð við Norðlingaholt en ekki borgað fyrir það. Númerið á bílnum hafi náðst og starfsfólk bensínstöðvarinnar hringt til að grafast fyrir um málið en þá hafi komið í ljós að númeraplötunum hafi verið stolið af öðrum bíl og settar á stolna bílinn.

Stal númeraplötum til að setja á stolna bílinn

„En svo veit ég ekki meira. Eina sem ég veit er það að hann næst á fimmtudeginum og þá hafði hann verið að stela kjöti af einhverjum stórmarkaðinum . Þá nappast hann og situr inni í heilan sólarhring, kemur út á föstudeginum og ég hitti manninn," segir Jón. Jón segist síðan hafa tekið bílinn þegar að hann hafi verið búinn að tæma hann. Hann hafi síðan ekki haft önnur afskipti af honum.

Sólarhringi eftir að Jón fékk bílinn til baka var maðurinn búinn að stela öðrum bíl í Reykjanesbæ. Jón segist hafa heyrt af því að maðurinn hafi áður verið búinn að stela tveimur eða þremur bílum með svipuðum hætti. Þá segir hann það jafnframt vera með ólíkindum að maðurinn virðist hafa getað dulist undir nafni Stefáns þann sólarhring sem að hann sat í fangelsi. „Hann er greinilega sprenglærður í þessu," segir Jón.

Maðurinn var handtekinn í Borgarnesi í morgun. Friðrik Smári Björgvinsson, yfirlögregluþjónn hjá rannsóknardeild lögreglunnar, segir að verið sé að flytja hann til Reykjavíkur. Hann sé grunaður um bílaþjófnað og greiðslukortamisferli. Á morgun verði tekin ákvörðun um hvort krafist verði gæsluvarðhalds yfir manninum.