Pellegrino aftur til Liverpool

Mauricio Pellegrino er aftur genginn til liðs við Liverpool en í þetta sinn sem hluti af þjálfarateymi Rafael Benitez, knattspyrnustjóra liðsins.

Pellegrino lék þrettán leiki fyrir Liverpool eftir að hafa gengið til liðs við félagið í janúar 2005. Hann lék lengi undir stjórn Benitez hjá Valencia og var síðast þjálfari varaliðsins hjá Valencia.

Pellegrino er 36 ára gamall og mun starfa við hlið Sammy Lee en þeir koma í stað þeirra Pako Ayesteran og Alex Miller sem hafa báðir farið frá félaginu.

„Hans hlutverk verður að þjálfa aðalliðið og mun einnig sinna séræfingum," sagði Benitez um ráðningu Pellegrino. „Hann getur einnig unnið sérstaklega með varnarmennina sem og varaliðið."