Redknapp vildi fá Kaboul

Harry Redknapp, stjóri Portsmouth, hefur greint frá því að hann reyndi að fá Younes Kaboul frá Tottenham en hætti við þegar hann heyrði hvað félagið vildi fá fyrir hann.

Kaboul átti erfitt uppdráttar á sínu fyrsta tímabili hjá Tottenham eftir að hafa komið frá Auxerre fyrir 8,2 milljónir punda.

Redknapp hefur áhuga á að bæta einum miðverði við leikmannahópinn sinn þar sem Sylvain Distin og Sol Campbell eru fyrir.

Talið er að Tottenham vilji fá svipaða upphæð og þeir reiddu fram fyrir ári síðan.

„Ég hafði áhuga á að fá hann en þeir vildu fá meira en við vorum tilbúnir að borga. Það er því ekkert að gerast þar," sagði Redknapp.