Redknapp fær 780 milljónir fyrir að halda Spurs uppi

Harry Redknapp hefur byrjað ótrúlega í starfi sínu sem knattspyrnustjóri Tottenham og hefur liðið náð í sjö stig í fyrstu þremur leikjunum síðan ráðning hans var tilkynnt.

Sigur á Bolton, jafntefli við Arsenal á útivelli og sigur á Liverpool hafa heldur betur komið Lundúnaliðinu á réttan kjöl eftir afleita byrjun á leiktíðinni.

Breska blaðið Mirror heldur því fram að Redknapp hafi ekki aðeins skrifað undir þriggja og hálfsárs samning sem færi honum 780 milljónir króna í árslaun - heldur hafi stjórn Tottenham lofað honum öðrum 780 milljónum í bónus ef hann heldur liðinu í deildinni.