Ketsbaia spenntur fyrir Newcastle

Temuri Ketsbaia segir að hann myndi gjarnan vilja fá tækifæri til að snúa aftur til Newcastle í framtíðinni og þá sem knattspyrnustjóri.

Hann er nú á mála hjá kýpverska liðinu Anorthosis Famagusta sem hefur náð ótrúlegum árangri í Meistaradeild Evrópu. Liðið hefur til að mynda lagt bæði grísku stórliðin Olympiakos og Panathinaikos og náði síðast 3-3 jafntefli gegn Inter frá Ítalíu.

Ketsbaia lék á sínum tíma með Newcastle frá árunum 1997 til 2000 og er enn í miklu uppáhaldi hjá stuðningsmönnum félagsins.

Hann sagði þó að hann myndi einbeita sér að Famagusta enda ekki spennandi að fara til félags sem er til sölu, líkt og Newcastle er nú.

„Ef einhver kæmi að máli við mig nú myndi ég telja að það væri algert glapræði að fara til félagsins. Ég myndi vilja starfa hjá félagi sem væri með öll sín mál á hreinu."