Stefna Samfylkingarinnar skýr í Evrópumálum

Forysta Samfylkingarinnar hefur ekki umboð flokksins til að sækja um aðild að Evrópusambandinu, segir Ármann Kr. Ólafsson, þingmaður Sjálfstæðisflokksins. Varaformaður Samfylkingarinnar segir augljóst að umræddur þingmaður hafi ekki mætt á marga landsfundi Samfylkingarinnar.

Ármann Kr. Ólafsson, þingmaður sjálfstæðisflokksins, skrifar á heimasíðu sína að hann hafi talið að umboð forystu Samfylkingarinnar væri afdráttarlaust í Evrópumálum. Hann segir að eftir eigi að skilgreina samningsmarkmið aðildarumsóknar í Evrópusambandið og því hafi forysta og formaður flokksins ekki það umboð sem ætla mætti af ummælum sem fallið hafa. Ágúst Ólafur Ágústsson, varaformaður Samfylkingarinnar, segir Ármann ekki fara með rétt mál.

,,Það er alveg ljóst að þessi þingmaður Sjálfstæðisfloksins hefur ekki mætt á marga landsfundi samfylkingarinnar," segir Ágúst Ólafur. Stefna flokksins sé skýr og á seinustu tveimur landsfundum, seinast vorið 2007, hafi varið samþykkt ályktun þar sem segir að stefna beri á aðildarviðræður.

Í grein sem Stefán Jóhann Stefánsson, varaborgarfulltrúi Samfylkingarinnar, skrifaði í Morgunblaðið kom fram að á landsfundi flokksins í kjölfar hinnar svokölluðu póstkosningu haustið 2002 hafi verið skipaður 9 manna málefnahópur sem fékk það hlutverk m.a. að skoða ávinning Íslands af aðild að ESB og skilgreina helstu samningsmarkmið aðildarumsóknar. Ármann segir það vekja undrun að hópurinn hafi aldrei komið saman og því ljóst að engin samningsmarkmið séu til hjá Samfylkingunni.

Ágúst Ólafur vísar þessu á bug segir segir að Samfylking hafi einn flokka gefið úr sérstaka bók um samningsmarkmiðin.

Kristrún Heimisdóttir, aðstoðarmaður Ingibjargar Sólrúnar Gísladóttur utanríkisráðherra, sendi fjölmiðlum í morgun brot úr ályktun landsfundar Samfylkingar kosningvorið 2007. Hún sagði að borið hafi á skrifum pólitíkusa að undanförnu sem sýna þekkingarleysi á sögu og stefnu Samfylkingarinnar.

Þar kemur fram að Samfylkingin vill að Ísland sæki um aðild að Evrópusambandinu og hefji aðildarviðræður, unnið verði að víðtækri samstöðu um samningsmarkmið og að niðurstöður samninga verði bornar undir þjóðaratkvæði.

,,EES-samningurinn er bæði nauðsynleg forsenda og helsta ástæða þess efnahagslega ávinnings sem þjóðin hefur notið á undanförnum árum.

Jafnaðarmenn voru í fararbroddi við gerð þess samnings. Stefna Samfylkingarinnar í Evrópumálum hefur frá upphafi byggt á traustu umboði frá flokksmönnum, eins og fram kom í vandaðri stefnumótun og atkvæðagreiðslu meðal flokksmanna allra um stefnu í Evrópumálum á árunum 2001-2003.

Eitt brýnasta verkefni stjórnmálanna er að skapa atvinnulífi og fjölskyldum rekstrarumhverfi og starfsskilyrði sem búa í haginn fyrir áframhaldandi velsæld, bætt lífsgæði og aukinn stöðugleika. Íslensk heimili búa við hæstu vexti og hæsta matvælaverð í Evrópu. Fyrir vikið er vinnudagur hér lengri en í nokkru landi sem við viljum bera okkur saman við.

Frekari útrás atvinnulífsins eru takmörk sett við núverandi aðstæður.

Óstöðugleiki og gengissveiflur hamla vexti sprotafyrirtækja og draga úr tiltrú á grónum íslenskum fyrirtækjum á erlendum vettvangi. Aðild að Evrópusambandinu og aðild að Efnahags- og myntbandalagi Evrópu er nauðsynleg til að tryggja efnahagslegan stöðugleika til lengri tíma litið og skapa íslenskum heimilum og fyrirtækjum samkeppnishæft rekstrarumhverfi.

Ísland á að vera fullgildur þátttakandi í Evrópusamstarfi. Ísland er nú þegar aðili að flestum þáttum Evrópusamstarfsins og því ástæðulaust að ætla annað en að aðildarviðræður gætu gengið greiðlega. Breyta þarf stjórnarskrá áður en aðild að Evrópusambandinu getur tekið gildi hér á landi, en sú staðreynd kemur ekki í veg fyrir að sótt sé um aðild og gengið frá aðildarsamningi. Upptaka evru er hins vegar þá fyrst möguleg þegar nauðsynlegum aga hefur verið komið á efnahagsstjórn í landinu," segir í ályktun Samfylkingarinnar sem Kristrún sendi fjölmiðlum.