Burnley sló út Chelsea

Burnley gerði sér lítið fyrir í kvöld og sló út Chelsea á Stamford Bridge er liðin mættust í ensku deildarbikarkeppninni í kvöld.

Burnley leikur í ensku B-deildinni en hafði engu að síður betur gegn toppliði úrvalsdeildarinnar í kvöld eftir sigur í vítaspyrnukeppni. Staðan eftir venjulegan leiktíma og framlengingu var 1-1.

Brian Jensen, markvörður Burnley, var hetja sinna manna í kvöld. Hann varði tvær spyrnur, frá Wayne Bridge og John Obi Mikel en leikmenn Burnley misnotuðu aðeins eina vítaspyrnu.

Wade Elliott hefði getað tryggt Burnley sigur með því að skora í fimmtu umferð vítaspyrnukeppninnar en hann skaut framhjá. Jensen varði hins vegar frá Mikel í fyrstu umferð bráðabanans eftir að Mike Duff hafði skorað fimmta mark Burnley í vítaspyrnukeppninni.

Jóhannes Karl Guðjónsson var í byrjunarliði Burnley í kvöld en var tekinn af velli á sjöundu mínútu framlengingarinnar.

Didier Drogba kom Chelsea yfir á 27. mínútu en hann hefur verið frá á tímabilinu vegna meiðsla. Þetta var hans fyrsta mark á leiktíðinni en markið hans í kvöld kom eftir undirbúning Frank Lampard.

Burnley var hins vegar ekki búið að játa sig sigrað og á 69. mínútu jafnaði Ade Akinbiyi metin fyrir liðið eftir að hafa fylgt eftir skoti Chris Eagles.

Franco di Santo meiddist í upphafi framlengingarinnar og þar sem Chelsea var búið að nota sínar þrjár skiptingar urðu þeir að klára leikinn einum manni færri.

Hins vegar fékk Steven Caldwell, varnarmaður Burnley, að líta rauða spjaldið þegar skammt var til loka framlengingarinnar. Hann fékk þá sína aðra áminningu fyrir brot á Florent Malouda.