Mýrarhúsaskólamáli verður áfrýjað

Máli stúlkunnar í Mýrarhúsaskóla, sem renndi hurð á höfuð kennara síns, verður áfrýjað. Þetta segir Guðmundur Pétursson, lögmaður móður stúlkunnar.

Stúlkan faldi sig fyrir samnemendum sínum inni í vinnurými kennara, til að forðast einelti. Þegar kennarinn fór að svipast um eftir stúlkunni renndi stúlkan hurð á höfuð kennarans með þeim afleiðingum að 25% varanleg örorka hlaust af.

Kennarinn stefndi móðurinni fyrir hönd ólögráða dóttur hennar og Seltjarnarnesbæ, sem rekur Mýrarhúsaskóla. Héraðsdómur sýknaði Seltjarnarnesbæ í málinu en dæmdi móðurina til greiðslu 10 milljóna króna skaðabóta.

Lögmaður móðurinnar segir að ekki sé búið að gefa út áfrýjunarstefnuna en það verði gert öðru hvoru megin við mánaðarmótin.