Ekkert þokast í rannsókn á Keilufellsárás

Ekkert hefur þokast í rannsókn lögreglu á árás á sjö karlmenn í Keilufelli á laugardag. Fjórir menn eru í gæsluvarðhaldi vegna málsins en yfirheyrslur yfir þeim hafa engan árangur borið.

Árásarmennirnir réðust inn á heimili í Keilufelli síðdegis á laugardag vopnaðir kylfum, exi og öðrum bareflum. Talið er að þeir hafi verið 10 til 12 talsins. Þegar inn kom létu þeir höggin dynja á íbúunum, sjö pólskum karlmönnum, þannig að þeir hlutu töluverða áverka og beinbrot. Einn hinna slösuðu liggur enn á spítala með samfallið lunga, brotinn handlegg og brotna augntótt.

Fram hefur komið í fréttum að fórnarlömbin telji árásarmennina vera úr pólsku glæpagengi sem beiti landa sína kúgunum og ofbeldi. Fjórir pólskir karlmenn voru handteknir á laugardag grunaðir um aðild að málinu og voru þeir úrskurðaðir í þriggja vikna gæsluvarðhald. Yfirheyrslur yfir þeim hafa staðið yfir síðan þá en engan árangur borið.

Rannsóknardeild lögreglunnar hefur nú sett á fót rannsóknarhóp til að reyna að komast til botns í málinu. Þá leitar hún enn að árásarmönnunum sex til átta sem enn ganga lausir. Að sögn lögreglunnar hefur hún þó litlar vísbendingar um hvar þeir eru niðurkomnir eða hvert tilefni árásarinnar var.