Verða að tryggja að yfirgefin hús séu mannheld

Jón Viðar Matthíasson, slökkviliðsstjóri á höfuðborgarsvæðinu, segir það algjörlega á ábyrgð eigenda yfirgefinna húsa í miðbænum að tryggja að þau séu mannheld. Hann furðar sig á því að þeir hafi ekki tryggt húsin betur og boðar aðgerðir gangi eigendurnir ekki betur frá húsunum.

Greint var frá því í fréttum í morgun að eldur hefði kviknað í yfirgefnu húsi við Hverfisgötu 33-34, en til stendur að rífa það. Reykkafarar voru sendir inn í húsið til að kanna hvort það væri ekki örugglega mannlaust en fundu þá sofandi útigangsmann í risi þess og björguðu honum út. Þetta er ekki í fyrsta sinn sem kveikt er í húsinu og hefur slökkviliðið vaxandi áhyggjur af frágangi húsa sem bíða niðurrifs.

Jón Viðar Matthíasson slökkviliðsstjóri á höfuðborgarsvæðinu segir menn þar á bæ hafa bent á í gegnum tíðina að það geti verið fólk í þessum húsum og slökkviliðinu beri að leita að því. „Við erum að leita í húsum sem eru kannski reykfyllt og þar eru jafnvel göt í gólfum og því mikil hætta," segir Jón Viðar. Hann bendir einnig á að slökkviliðsmenn eigi líka á hættu að stinga sig á sprautunálum þar sem fíkniefnaneytendur haldi sig oft í yfirgefnum húsum. „Mér finnst bagalegt að bjóða mínum mönnum upp á slíkt vinnuumhverfi," segir Jón Viðar.

Geta byrgt glugga á kostnað eigenda

Hann kallar eftir aðgerðum hjá eigendum húsanna og segir greinilegt að þeir hafi hingað til ekki staðið sig. Aðspurður hvað slökkviliðið geti gert í málinu segir Jón Viðar að það geti skipað viðkomandi aðila að byrgja glugga. „Ef ekki er orðið við því þá getum við gert það á kostnað eigandans," segir Jón Viðar og segist vonast til að eigendur bregðist nú við.

Bent hefur verið á að eigendur yfirgefinna húsa þurfi að bíða eftir leyfum til þess að rífa hús þangað til borgaryfirvöld hafa samþykkt það sem koma á í staðinn. Aðspurður segir Jón Viðar að á meðan leyfi til niðurrifs sé ekki fyrir hendi sé það á ábyrgð eigendanna að halda húsi lokuðu. „Menn eru þarna með ákveðnar eignir og meðan þær eru uppistandandi bera þeir ábyrgð á þeim. Það er að mínu mati aukaatriði hversu langan tíma það tekur að fá leyti til að rífa hús. Menn eiga að hafa þau örugg," segir Jón Viðar.