Fimm létust í skotárás í Chicago

Byssumaður sem skaut og myrti fimm konur í fataverslun í verslunarmiðstöð í úthverfi Chicagoborgar gengur laus samkvæmt upplýsingum lögreglu. Verið er að rannsaka vettvang skotárásarinnar í Brookside verslunarmiðstöðinni í Tinley Park í Illinois.

T.J. Grady lögreglustjóri Tinley Park sagði CNN sjónvarpsstöðinni að yfirvöld vissu ekki hver ástæðanfyrir árásinni í Lane Bryant versluninni væri. Nöfn fórnarlambanna hafa ekki verið gefin upp.

Grady sagði fréttamönnum að hringt hefði verið í neyðarlínuna 911 klukkan 10:44 að staðartíma, eða 16:44 að íslenskum tíma. Leitað var ítarlega í búðum í verslunarkjarnanum samkvæmt heimildum Grady og svo virtist sem árásarmaðurinn hefði yfirgefið svæðið. Viðskiptavinir nærliggjandi verslana lýstu ástandinu sem spennuþrungnu.

Byssumaðurinn mun hafa verið af afrísk-amerískum uppruna og er talið að hann hafi verið einn að verki.