Börðust við stjórnarhermenn í höfuðborg Tsjad

Uppreisnarmenn í Tsjad réðust inn í höfuðborg landsins í dag og virðast hafa yfirhöndina í áköfum bardögum við stjórnarherinn. Franski herinn gætir útlendinga í borginni á nokkrum stöðum.

Uppreisnarmenn börðust við stjórnarhermenn á götum höfuðborgar Tsjad N'Djamena í dag. Útlendingar sem búa í borginni sögðu í tölvupóstum frá borginni að skæruliðar virtust hafa betur. Sarkozy Frakklandsforseti átti langt samtal við Idriss Deby forseta í dag, á meðan bardagar geysuðu allt í kringum forsetahöllina. Frakkar eru með orrustuflugmenn og eitt þúsund hermenn í Tsjad, samkvæmt varnarsáttmála ríkjanna, og fluttu fleiri menn þangað í gær.

Franska sendiráðið í N'Djamena safnaði erlendum ríkisborgurum saman á nokkrum stöðum í borginni í dag í því skyni að koma þeim úr landi, ef ef nauðsyn krefði. Franskar sveitir verja útlendingana en hafa ekki blandað sér í átökin.

Stjórnvöld í Tsjad saka stjórnina í Súdan um að styðja uppreisnarmennina. Stöðvar þeirra hafa verið við landamæri Tsjad og Súdans en nú bendir allt til að þeir séu um það bil að ná höfuðborginni á sitt vald. Fyrir nokkrum vikum komst Idriss Deby forseti Tsjad í fréttirnar þegar hann fyrirskipaði réttarhöld yfir Frökkum sem höfðu reynt að koma 103 börnum ólöglega úr landi. Frakkarnir ætluðu að nota íslenska flugvél, sem var á langtímaleigusamningi, til að koma börnunum til Frakklands.