Boateng hefur náð samkomulagi við Hull

Nýliðar Hull City í ensku úrvalsdeildinni eru að ganga frá kaupum á miðjumanninum George Boateng frá Middlesbrough. Þessi 32 ára leikmaður hefur samþykkt tveggja ára samning.

Paul Duffen, stjórnarformaður Hull, segir að leikmaðurinn sé á leið í læknisskoðun og formlega verði gengið frá kaupunum strax eftir helgi.

„Það er allt klappað og klárt, það á bara eftir að skrifa undir. Hann gat ekki gert það fyrr því hann er í Frakklandi að leika ágóðaleik fyrir börn í Afríku," sagði Duffen.

Boateng lék áður með Feyenoord, Coventry og Aston Villa en hann hefur leikið yfir 200 leiki á sex tímabilum með Middlesbrough.

Þá mun Hull líklega fá bakvörðinn Bernard Mendy á frjálsri sölu en þessi fyrrum leikmaður Paris St Germain hefur þegar staðist læknisskoðun á Riverside.