Wenger vill fá meira frá Walcott í vetur

Arsene Wenger, stjóri Arsenal, segist reikna með því að Theo Walcott muni spila stærra hlutverk í liði Arsenal á komandi leiktíð en hann gerði í fyrra.

Hinn ungi Walcott var keyptur frá Southampton árið 2006 og hefur staðið sig vel með Arsenal á undirbúningstímabilinu í sumar.

"Theo er í betra standi nú en hann var fyrir ári síðan og hann er enn bara 19 ára gamall. Ég vona að hann eigi eftir að verða fastur partur af hópnum hjá okkur á þessari leiktíð. Ég hef trú á honum en auðvitað fer þetta allt eftir frammistöðu hans á vellinum. Hann er betri á boltanum og hefur það sem til þarf til að skora mörk. Ég vona að hann sýni það í vetur," sagði Wenger.