Vilja efla kynningu á iðn- og starfsnámi fyrir börn og unglinga

Borgarstjórn Reykjavíkur samþykkti í dag tillögu borgarfulltrúa F-lista og Sjálfstæðisflokks um að Reykjavíkurborg geri áætlun sem miði að því að höfuðborgin verði í fremstu röð sveitarfélaga varðandi kynningu á iðn- og starfsnámi fyrir börn og unglinga.

„Í tillögunni felst að Reykjavíkurborg setji af stað markvissa vinnu sem leidd verði af skólasviðum borgarinnar til að tryggja aukna kynningu og menntun iðn- og starfsnáms með fjölbreyttum aðferðum. Markmiðið er að borgin verði leiðandi í því að hefja námið upp á þann stall sem það verðskuldar. Borgin skoði margs konar leiðir til að kynna iðn og starfsgreinar. Haldin verði námskeið, útbúin verði skólastofa á hjólum með tækjum til að kenna ólíkar starfsgreinar og ólík störf verði kynnt fyrir leikskólabörnum m.a. með hlutverkaleikjum," segir í tilkynningu frá Reykjavíkurborg.

Þá er lagt til að framúrskarandi árangur í starfs- eða iðnnámi verði verðlaunaður sérstaklega með tilkomu nýrra verðlauna. Starfsfræðsla verði aukin í grunnskólum, meðal annars með samstarfsverkefnum við nýjan öflugan iðnskóla í borginni og með því að efla samstarf við Samtök iðnaðarins, iðn- og þjónustufyrirtæki og fleiri hagsmunaaðila.