Zidane heldur að Real Madrid fái Ronaldo

Zinedine Zidane telur að Real Madrid muni á endanum krækja í Cristiano Ronaldo, vængmann Manchester United. Spænska stórliðið hefur ekki farið leynt með gríðarlegan áhuga sinn á leikmanninum.

„Alltaf þegar Real Madrid vill fá einhvern leikmann þá fá þeir hann," sagði Zidane, fyrrum leikmaður Real Madrid. „Hann átti frábært tímabil og ef hann vill spila með Real Madrid þá getur hann það."

Zidane kostaði 45,8 milljónir punda þegar hann var keyptur til Real Madrid frá Juventus árið 2001. Það er í dag metupphæð sem greidd hefur verið fyrir leikmann. Zidane heldur að Real Madrid gæti þó þurft að borga enn meira til að landa Ronaldo.

„Ef hann fer til Madríd þá verður kaupféð verulega hátt. Það mun líka vera fínt fyrir mig ef hann verður dýrasti leikmaður heims," sagði Zidane.