Brot 400 mannabeina frá 11. september rannsökuð

Tekist hefur að bera kennsl á fjögur fórnarlömb árásarinnar á World Trade Center 11. september 2001 með rannsóknum á erfðaefnum úr beinum sem fundust undir malbiki nálægt vettvanginum.

Um 400 brot af mannabeinum hafa fundist undir malbikslagi vegar sem notaður var til að flytja brak tvíburaturnanna á burt. Meðal þeirra sem nýverið voru borin kennsl á eru Ronald Keith Milstein og Alejandro Castano en sá síðarnefndi starfaði sem sendill hjá ritfangafyrirtæki og var að afhenda fyrirtæki á 97. hæð suðurturnsins sendingu af pennum og pappír þegar árásin var gerð.

Jarðneskar leifar fórnarlamba hafa einnig fundist þar sem bygging Deutsche Bank stóð og á Liberty Street en í allt hafa fundist 21.000 líkamshlutar af einhverju tagi á svæðinu, þar af 1.800 sl. tvö ár. Enn á eftir að bera kennsl á líkamsleifar yfir 40% af þeim 2.749 sem fórust í og við World Trade Center 11. september 2001. Sérfræðingar á vegum borgarinnar beita nú nýrri tækni til að vinna erfðaefni úr þeim líkamsleifum sem finnast.

AP greindi frá.