Þriggja mánaða fangelsi fyrir fíkniefnaakstur

Héraðsdómur Norðurlands eystra hefur dæmt karlmann í þriggja mánaða fangelsi fyrir ítrekaðan akstur undir áhrifum fíkniefna og fíkniefnabrot.

Maðurinn var gripinn tvisvar á tveimur dögum í október síðastliðnum fyrir akstur undir áhrifum amfetamíns, annars vegar á Akureyri og hins vegar á leiðinni frá Reykjavík til Akureyrar. Í síðarnefnda skiptið fann lögregla lítilræði af amfetamíni í fórum hans.

Maðurinn játaði brot sín en hann hafði sex sinnum áður hlotið refsingu vegna brota á umferðarlögum, almennum hegningarlögum og lögum um ávana- og fíkniefni. Með brotunum rauf hann skilorð og þótti dómnum ekki ástæða til að skilorðsbinda refsinguna nú. Þar sem um þriðja ítrekunarbrot var að ræða var maðurinn einnig sviptur ökurétti ævilangt.